EN  | BM
Tema: Biru dan Hijau Tema: Biru dan Hijau Tema: Merah Tema: Hijau
Text: Tambah BesarText: AsalText: Tambah Kecil
Latar Belakang: 1 Latar Belakang: 2 Latar Belakang: 3 

PETROS deka nyadi kelai pemujur Sarawak dalam industri minyak enggau gis
Tarikh : 13 Jan 2020  Sumber Berita: https://www.utusanborneo.com.my/2020/01/13/petros-deka-nyadi-kelai-pemujur-sarawak-dalam-industri-minyak-enggau-gis
 
 Abang Johari lebuh bejaku ba pengerami ngelancharka PETROS.
ENGGI KITAI: Abang Johari lebuh bejaku ba pengerami ngelancharka PETROS.


PENGAWA numbuhka Petroleum Sarawak Bhd (PETROS)  kena bulan Mac 2018 ukai aja nentuka Sarawak aktif ngaul diri dalam industri minyak enggau gis tang meri perintah nengeri kuasa nyaga sereta ngemata ba pemansut minyak enggau gis di nengeri tu.

Industri minyak enggau gis, entara penyaup ke pemadu besai ngagai pengelantang ekonomi nengeri tu kenyau ari keterubah Sarawak ditumbuhka.

Kepala Menteri Datuk Patinggi Abang Johari Tun Openg dalam jaku pesan Hari Krismas enggau Taun Baru 2020 kena 23 Disember 2019 meri jamin perintah nengeri deka nampung atur ke patut dikena nentuka pemeranak puku, penguna enggau galau domestik mengkang tegap.

Siti ari industri ti dikemeratka iya nya kuasa nyaga sereta ngemata perintah nengeri ba pemansut minyak enggau gis Sarawak nengah PETROS.

“Ngambika bisi kuasa nyaga sereta ngemataka pemansut minyak enggau gis ari baruh Ordinan Ngelumbung Minyak (OMO) 1958 Petroleum Sarawak Berhad tauka PETROS ditumbuhka.

“PETROS bejalaika pengawa nentuka Sarawak aktif ba  aktiviti ngulih enggau ba ngeluarka produk industri minyak enggau gis di nengeri tu.

“Ba awak ke semak tu, PETROS diberi tanggungpengawa berat ngatur dagang gis domestik dalam nengeri kediatu ari baruh Petronas,” ku iya.

Beberapa taun ti deka datai ku iya, dipelaba deka meda mayuh agi kaul PETROS ba industri minyak enggau gis.

Laban tu ku iya, penyampau pemeranak puku dalam industri minyak enggau gis sereta petrokimia ba nengeri tu dipelabaka nambah.

“Nemu utai ke nyadi  sereta nemu senentang hak kitai udah ngujungka kitai ngaku kuasa dikena mantaika pemansut penatai pemisi baru sereta ngubah gaya penatai pemisi baka ti dikedeka ke kitai.

“ Berengkah ari taun tu (Januari 2019) kami neritka chukai nyual sepenyampau lima peratus (5%) ba produk minyak enggau gis ti dieksport.

“ Chukai nyual ti dipelaba meri penatai pemisi urung RM3 bilion setaun ngagai Sarawak,” ku iya.

Ngenang baru pengerami ngelancharka PETROS, Abang Johari madahka perintah nengeri deka ngemataka PETROS dikena nentuka PETROS tegap, ngasi sereta sikar bejalaika pengawa iya dalam industri minyak enggau gis.

Nitih ku iya pengawa nyaga sereta ngatur enggau ngemata nengah perintah nengeri ba PETROS nya mandatori.

“ Nya alai PETROS meseti ngemansangka penatai ti strategik ba Sarawak ngambika ngerembai sereta meri pemaik ekonomi ti tegap nengah model pengawa dagang, lalu ba awak ke sama nyaga pekara dikemerat perintah nengeri enggau pemansut iya,” ku iya.

Ba pengerami ke sama Abang Johari madahka Sarawak deka ngempu magang semua pengawa nyaga enggau ngemata ba sukut ngulihka enggau ngaga produk ulu dalam industri minyak enggau gis di nengeri tu ( berengkah ari  Julai 2018).

Iya nambah, nya sebagi mulaika kuasa ari perintah besai ngagai perintah nengeri Sarawak.

Pengawa numbuhka PETROS ku iya, endang ngemujurka hak konstitusyen ara baruh Pekara 2 (c) Rintai nengeri enggau 8 (j) Rintai Perintah Besai Tusun 9 Konstitusyen Perintah Besai asil randau mulaika kuasa entara perintah nengeri enggau perintah besai.

Pengawa mulaika kuasa nya ku iya setipak enggau kuasa ti diungkup dalam Sempekat Malaysia 1963 (MA63) ngagai Sarawak.

Ku iya, sesapa individu tauka kompeni ke bisi kaul enggau industri minyak enggau gis di nengeri tu mesti ngembuan lisin, permit, suwa tanah sereta dikemendarka sekalika ari baruh OMO 1958 tauka Ordinan Ngagihka Gis (GDO) 2016.

Taja pia  iya meri jamin pengawa neritka undang-undang nengeri nya enda nagang pekara ti dikemerat tauka puku ti di peranakka Petronas (Petroliam Nasional Berhad) enggau kompeni ke bukai ti ubisi kaul dalam industri minyak enggau gis di Sarawak.

“Pengawa ngelancharka PETROS ngelaika siti agi pemujur industri minyak enggau gis nengeri sereta Sarawak, ke tegal ke ngembuan pemansut baru ti ulih ngangkatka model ngatur pemansut nengeri,” ku iya.

Ngenang senentang pemujur ke bukai ti bekaul enggau industri minyak enggau gis di nengeri tu berindik ari pengawa numbuhka PETROS, iya nya pengawa ngemansang projek loji metanol di Tanjung Kidurong, Bintulu kena  September 2019.

Projek tu ngelaika singkang keterubah ba  pengawa ngemujurka pengawa ngemansang  enggau pengawa ngaga loji besai methanol ti keterubah ba nengeri lalu ti kedua ba menua nya pengudah di Labuan.

Dikelala enggau nama Sarawak Petchem Methanol, projek tu deka nyadi pelasar dikena ngubah Bintulu nari ngemansutka gis lela asal (LNG) ti tebilang di dunya nyadika hub petrokimia.

Ku Abang Johari, pengawa ngemansangka industri petrokimia deka nyadi ‘injin’ pemansang ekonomi ti pemadu besai Sarawak laban nya deka mansutka metanol enggau penyampau ninting taun, 1.7 tan metrik setaun.

“ Sarawak Petchem deka nyadi kompeni enggi nengeri Sarawak ti keterubah mansutka metanol enggau penyampau ninting taun, 1,7 tan metrik setaun.

Pemutus numbuhka Petchem Sarawak ku iya, ba maya ke betul laban mayuh gis asli nyadi asil mata dikena ngemansangka Loji Metanol ke besai.

“ Loji nya ku iya dipelaba deka beoperasyen ba taun 2023 sereta deka nerima 160 juta meter padu standard sehari (MMSCFD) asil mata gis asal ari Petronas,” ku iya.

Abang Johari mega madahka projek nya ngelaika siti agi sejarah besai, ukai semina ba pengawa nempa Sarawak nyadi nengeri industri tang ke beguna amat ngemujurka pengawa enggau ba industri minyak enggau gis, kelebih agi dalam sektor produk petrokimia.