EN  | BM
Theme: Blue and Green Theme: Blue and Green Theme: Red Theme: Green
Font: IncreaseFont: NormalFont: Decrease
Background: 1 Background: 2 Background: 3 
The Official Website of
Ministry of Utilities Sarawak

Aku ukai orang silap mata: KM
Posted on : 14 Jan 2020  Source of News: https://www.utusanborneo.com.my/2020/01/14/aku-ukai-orang-silap-mata-km
 
 Abang Johari nyuaka Bup  Inisiatif ngagai Temenggong Che Bujang maya program ‘Sarawakku Sayang’ beserimbai enggau nyambut taun ke-3 iya nyadi Kepala Menteri Sarawak keenam. — Gambar Chimon Upon
KE REFEREN: Abang Johari nyuaka Bup Inisiatif ngagai Temenggong Che Bujang maya program ‘Sarawakku Sayang’ beserimbai enggau nyambut taun ke-3 iya nyadi Kepala Menteri Sarawak keenam. — Gambar Chimon Upon

 

KOTA SAMARAHAN: Kepala Menteri Datuk Patinggi Abang Johari Tun Openg madahka iya ukai orang main silap mata ti ulih nembuka sekeda projek pemansang rayat tekala nya.

Ku iya, pengawa nembuka sekeda projek rayat baka bekal ai enggau elekterik kelebih agi di menua pesisir nengeri tu begunaka timpuh.  

“Beri aku timpuh, au (pengawa nembuka sekeda projek bekal ai enggau elekterik di menua pesisir) begunaka timpuh, enda ulih digaga tekala nya.

“Aku nadai penemu silap mata. Aku ukai David Copperfield. Aku begunaka timpuh ngaga semua tu...Asalka bisi pemansut belanja, Sarawak bisi jalai pemansut duit dikena ngaga semua projek tu ari baruh Atur Pemansang Malaysia Lumpar Ke-12 (2020-2025),” ku iya.

Iya madah munyi nya lebuh ngenataika pesan maya Program ‘Sarawakku Sayang’ beserimbai enggau nyambut taun Ke-3 Abang Johari nyadi Kepala Menteri Sarawak keenam di Dataran Samarahan ditu, kemari.

Ku Abang Johari, perintah nengeri ari baruh iring iya deka nampung pengawa ke digaga bala ketuai nengeri ke dulu ari tu kelebih agi Niang Pehin Sri Adenan Satem ti ngemeratka pemansang menua pesisir.  

“Ari baruh RMK12, berengkah ari taun tu nyentuk ke taun 2025 tim Tok Nan (Adenan) ti diiring aku merambu belama deka ngubah pelasar ekonomi ngagai ekonomi digital dikena nempa Sarawak nyadi nengeri maju dalam federasyen Malaysia manggai ba taun 2030.

“Keterubah, kami deka majakka pengawa mekal ai, elekterik, jalai alun nyengkaum jematan dikena nyambungka semua kandang menua di Sarawak kelebih agi di menua pesisir,” ku iya.

Perintah nengeri ku iya, deka ngena chara baru ti diakun dunya baka Bekal Ai Menua Pesisir Alternatif Sarawak (SAWAS) enggau Alternatif Bekal Elekterik Menua Pesisir (SARES) dikena mekalka ai beresi enggau elekterik ke genturung pendiau.  

Diatu ku iya, Sarawak ngemalatka pengawa nyendiak bekal ai beresi ngagai kandang menua pesisir nyengkaum Samarahan, Simunjan nyentuk ke Kabong enggau Sebuyau.

Ari baruh RMK12 ku iya, perintah nengeri deka majak nampung pengawa nyukat tanah nyengkaum tanah Hak Adat Bumiputera (NCR) dikena ngakun hak sida ngempu tanah NCR.

“Perintah nadai kala bisi ati deka ngambi tanah rayat, tang meri hak ngagai pengempu ngambika tanah nya ulih di kemansang ke tuju betanam betupi komersial,” ku iya.

Perintah nengeri mega ku iya, deka ngemansangka sektor dagang temuai laban nya nyata meri penatai pemisi ngagai nengeri.

“Udah tentu pekara keempat ti deka dikemansangka kitai iya nya pengelandik kitai...Enti tu mujur kita deka nampung nya nyentuk RMK13, 2025-2030.

“Kelimpah ari nya, kami deka matih ketuai kitai sekalika ba renggat orang kereja perintah, mensia mayuh enggau politik,” ku iya seraya madahka deka matih orang ti tau ngadu sereta ngatur Sarawak enggau betul, laban nya ukai mudah.

Ketuai di Sarawak ku iya, mesti ngembuan pengelandik enggau peneleba dikena nyemelaka guna ba jalai pengarap.  

Ku iya baru, ari sukut jalai pengarap, Sarawak nengeri keterubah di Malaysia numbuhka Unit Pekara Jalai Pengarap Bukai (UNIFOR) laban perintah nemu tetiap jalai pengarap ngajar mensia nyadi manah magang.

“Aku deka ngemansangka Sarawak nengah chara tu lurus...Di Sarawak nadai isu begedika bansa, utai ke naydi apa di Semenanjung Malaysia, anang mai ke Sarawak.

“Jadi melaki bini enggau bansa bukai ukai pekara ke baru ba rayat Sarawak lalu ketegal nya mih nadai penyarut ba pupu bansa nyadi ditu,” ku iya.

Sentang Program Sarawakku Sayang, Abang Johari nya dikena ngelalau rayat ngambika terus besaup nyaga Sarawak enggau manah baka ti dikedeka ke Tok Nan maya iya nyadi Kepala Menteri.

“Samarahan ke nyadi endur keterubah ngatur program tu bisi pemansang ke digaga bala ex-Kepala menteri kitai, keterubah Tun Pehin Sri Taib Mahmud ti mali Samarahan ari genturung pendiau nyadi menua ke balat maju diatu.

“Tu ditangkanka Niang Tok Nan ti mega ngepunka pengawa politik iya di Samarahan.

“Nya kebuah seharitu, kitai nampung pengawa sayauka Sarawak. Aku enggau bala bakih ke bisi dalam kabinet deka nampung pengawa tu nengah chara ke bebida mimit,” ku iya.

Sama bisi datai bini Kepala Menteri Datuk Amar Juma’ani Tuanku Bujang, Sapit Kepala Menteri Datuk Amar Douglas Uggah Embas, Tan Sri Datuk Amar Dr James Jemut Masing, Speaker Kunsil Nengeri (DUN) Datuk Amar Mohamad Asfia Awang Nassar, Menteri Pelajar, Sains enggau Pansik Teknologi Dato Sri Michael Manyin Jawong, Menteri Dagang Temuai, Seni enggau Main Asal Datuk Abdul Karim Rahman Hamzah, Menteri Kaunsil Kandang Menua enggau Pengawa Berumah Dato Sri Dr Sim Kui Hian enggau Menteri Pengelantang Pendiau Komuniti, Ruang Bilik, Orang Indu enggau Pemansang Anak Mit, Dato Sri Fatimah Abdullah.